लिस्बन । पोर्चुगलमा क्रिप्टोकरेन्सीमा धेरैको आकर्षण बढ्दै गएको छ । नेपालीलगायत धेरै आप्रवासी समुदाय बिटकोइनमा आकर्षित भएको पाइएको छ ।
नेपालमा यसलाई गैरकानुनी मानिए पनि पोर्चुगलमा बस्ने नेपालीहरु बिटकोइन किन्न, यसको सदस्य बनेर कारोबार गर्न लालायित भएका छन् ।
पछिल्लो समयमा बिटकोइनमा उत्साही र लगानीकर्ताहरूको बृद्धि भइरहेको पाइएको छ । यसमा नेटवर्किडका रुपमा सदस्य बनाएर केहीले लाभ पनि लिइरहेका छन् । डिजिटल मुद्रामा राम्रो दृष्टिकोणको लागि कम्पनीहरू पनि बढ्दै गएका छन् । आफ्नो बिटकोइन लेनदेनहरूको विश्लेषण, भविष्यवाणी र व्यवस्थापन गर्नेहरु कम्पनीहरु आक्रमक ढंगले लागेका छन् ।
विभिन्न कम्पनीहरुले यसको कारोबारमा प्रोत्साहन गरिरहेका छन् । परम्परागत बजार र अर्थतन्त्रको अस्थिरताको बीचमा बिटकोइन र डिजिटल मुद्रामा कारोबार गर्न पोर्चुगल सक्रिय भएको पाइएको छ । आकर्षक, वैकल्पिक लगानीको अवसर प्रदान गर्दै डिजिटल मुद्राहरूमा बढ्दो यो परिवर्तनले पोर्चुगलका लगानीकर्ताहरूलाई उत्साहित बनाएको छ ।
तर, यसले अर्थतन्त्रमा समस्या ल्याउन सक्ने जानकारहरु बताउँछन् । धेरैजसोको लगानी यसैमा केन्द्रित हुँदा उत्पादन कम हुने, रोजगारी सिर्जना नहुने समस्या आउन सक्ने देखिएको छ । सम्भावित जोखिमहरूको व्यवस्थापन र निगरानी गर्न लगानीकर्ताहरु ने जानकार हुनुपर्ने कम्पनीको विश्लेषण छ ।
बिटकोइनमा लगानी गर्नु आकर्षक प्रस्ताव हुनसक्ने कतिपय अर्थशास्त्रीहरु सुझाव दिन्छन् । यहाँ क्रिप्टोकरेन्सीलाई मुद्राको सट्टा सम्पत्ति मानिन्छ। लगानीनीकर्ताहरूले आफ्नो कारोबारमा पुँजीगत लाभ कर तिर्नु नपर्ने भएकाले धेरै लगानीकर्ताहरुले यसको फायदा लिइरहेका छन् ।
तर, सर्वसाधारण, सीमित पैसा हुनेहरुले भने यसमा जोखिम आउँदा समस्या हुन सक्ने, त्यसका लागि आफै सचेत हुनुपर्ने अर्थशास्त्रीहरुको सुझाव छ ।
धेरै कमाउने आशाले कतिपय नेपाली बिटकोइनजस्ता क्रिप्टोकरेन्सी, हाइपर फण्डजस्ता अनलाइन नेटवर्किड बिजनेसमा लगानी गरेर डुबेका छन् । हाइपर फण्डमा धेरैजसो पोर्चुगलमा बस्ने नेपालीहरुले केही वर्षअगाडि आफ्ना सम्पत्ति गुमाएका थिए ।
