काठमाडौं । सरकारलाई संसदप्रति जवाफदेही बनाउने योजना बनाउनुपर्ने संसदीय समितिका सभापतिहरुले सभाभुखलाई आग्रह गरेका छन् ।
सभामुख देवराज घिमिरेसँग छलफल गर्दै संसदीय समितिका सभापतिहरुले सरकारले समितिका निर्देशनहरु पालना नगरेकाले जवाफदेही बनाउन कुनै उपाय खोज्नुपर्ने धारणा राखेका थिए ।
कृषि, सहकारी तथा प्राकृतिक स्रोत समितिका सभापति डा आरजु राणा देउवाले ‘सभापति भएपछि पूर्वसभापतिहरुसँग छलफल गरेको बताइन्। कसैले पनि रेस्पोन्स नगरेकाले सरकारलाई संसदप्रति उत्तरदायी र जवाफदेही बनाउने विषयमा कार्ययोजना नै आवश्यक भएको बताइन्
‘सरकारलाई संसदप्रति उत्तरदायी बनाउने गरी सभामुखले एउटा फेमवर्क बनाइदिनु राम्रो हुने उनको भनाइ छ ।
उद्योग तथा वाणिज्य र श्रम तथा उपभोक्ता हित समितिका सभापति अब्दुल खांनले पनि विगतका सभापतिहरुको अनुभव सुन्दा आफू उत्साहित हुन नसकेको जानकारी दिए । ‘पूर्व सभापतिहरुसँग कुरा गरेँ । समितिका निर्णय सरकारबाट पालना नहुने कुराले म हतोत्साहित भएँ’, उनले भने ।
११ भदौमा प्रतिनिधिसभाका १० वटा विषयगत समितिका सभापति चयन भएका थिए । बुधबारको छलफलमा १० मध्ये ८ वटा समितिका सभापति उपस्थित थिए ।
संसद सचिवालयका अनुसार अन्तर्राष्ट्रिय सम्बन्ध र पर्यटन समितिका सभापति राजकिशोर यादव र शिक्षा, स्वास्थ्य तथा सूचना प्रविधि समितिका सभापति भानुभक्त जोशी काठमाडौं बाहिर भएका कारण उपस्थित हुन नसकेका हुन् ।
