काठमाडौं । संयुक्त राष्ट्रसंघले मृत्युदण्ड रोक्न सम्बन्धीत देशलाई आग्रह गरेको छ । सिंगापुर र कुवेतमा हालै दिइएको मृत्युदण्डको निन्दा गर्दै तत्काल उक्त प्रावधान हटाउन ती राष्ट्रहरूलाई आह्वान गरिएको हो ।
सिङ्गापुरमा लागूऔषध ओसारपसारको आरोपमा ४५ वर्षीय एक नागरिकलाई शुक्रबार फाँसी दिइए पछि निन्दा गरिएको हो ।
कुवेतमा सन् २०१५ मा इस्लामिक स्टेट जिहादी समूहले गरेको आत्मघाती आक्रमणमा संलग्न रहेको अभियोगमा दोषी ठहर भएका पाँच जनालाई बिहीबार मृत्युदण्ड दिइएको थियो।
‘हामी कुवेत र सिंगापुरमा यो साता दिइएका मृत्युदण्डको निन्दा गर्दछौँ र कुनै पनि अवस्थामा हुने मृत्युदण्डको विरोध गर्दछौँ।’संयुक्त राष्ट्रसंघीय मानव अधिकार कार्यालयका प्रवक्ता सेइफ मगान्गोले प्रेस विज्ञप्ति जारी गर्दै भनेका छन् ।
विज्ञप्तिमा कुवेत र सिङ्गापुरलाई तत्काल मृत्युदण्डमा रोक लगाउन र मृत्युदण्डमा रोक लगाउने १ सय ७० भन्दा बढी राज्यमा सामेल हुन आग्रह गरिएको छ ।
