लिस्बन । पोर्चुगल नेपालको मुग्लिनजस्तै परिचित छ । सबै क्षेत्रका नेपालीहरु यहाँ आउँछन् । नेपालमा विभिन्न पेशा तथा व्यवसायमा अब्बल भइसकेका व्यक्तिहरुदेखि नयाँ यूवाहरु यहाँ आउने गर्छन् ।
श्रम बजारमा छिरेका युवादेखि नेपालमा उच्चश्रेणीमा रोजगारी गरेका तथा व्यवसायिक क्षेत्रमा अब्बल भइसकेका व्यक्तिहरु पनि पोर्चुगलमा आउँछन् । त्यसमध्ये एक हुनुहुन्छ बाग्लुङको बडिगाड गाउँपालिकाका यामेन्द्र घर्ती ।
जापानबाटै करियर सुरु गर्नुभएका यामेन्द्र अहिले रामेन विस्ट्रोमा अब्बल मानिनुहुन्छ । उहाँ जापानमा सात वर्ष बस्नुभयो । किचेनमा काम गर्नुभयो । त्यहाँ ख्याति कमाएर स्वदेशमै केही गर्ने चाहनाले नेपाल फर्किनुभयो ।
आशा, विस्वास र भरोसा राखेर उहाँ नेपाल फर्किनुभयो । व्यवसायसँगै राजनीतिमा संलग्न भएर नयाँ पहिचान बनाउने अठोट लिनुभएको थियो ।
नेपाल आएर केही वर्ष राजनीतिमा पनि जोडिनुभयो । निर्माण क्षेत्रको व्यवसायका साथै विभिन्न क्षेत्रमा लगानी पनि गर्नुभयो । व्यवसाय सोचेजस्तो भएन । सामूहिक लगानी गर्दा पनि राम्रो प्रतिफल आउन सकेन ।
उता राजनीतिमा पनि भनेजस्तो भएन । हक्की र इमान्दर स्वभावका यामेन्द्रलाई राजनीतिबाट पनि वितृष्णा भयो ।
त्यसपछि उहाँ यूरोप यात्रा तय गर्नुभयो । जापान छदैैँ यूरोपको सपना देखेपनि नेपालमै व्यवसाय र राजनीतिमा जम्ने उहाँको इच्छा थियो । अरुको झोला बोकेर राजनीतिमा चाकडी गर्ने प्रवृति सह्यै नभएपछि उहाँ सबै छोडेर यूरोप हानिुनुभयो ।
उहाँ एक दशकदेखि पोर्चुगलमा हुनुहुन्छ । जापानमा सिकेको अनुभवले उहाँलाई पोर्चुगलमा स्थापित गराउन सघाएको छ ।
यहाँको आजिटामा रामेन विस्ट्रोमा किचेनमा काम गर्दै आउनुभएको छ । उहाँ मास्टरसेफ पनि हुनुहुन्छ । उहाँले नयाँ व्यवसायी तथा सिक्न चाहनेलाई तालिम दिने, रामेन विस्ट्रोबारे परामर्श दिने गर्नुहुन्छ । उहाँ रामेनको सम्भावना, यसको महत्व र व्यवस्थान गर्ने तरिकामा अब्बल हुनुहुन्छ ।
यूरोपमा रामेनको लोकप्रियतासँगै उहाँको पनि लोकप्रियता बढ्दै गएको छ ।
पोर्चुगलको प्रख्यात स्पोट्र्स टिभी च्यानल, टाइम आउट म्यागेजिन लगायत विभिन्न सच्चारमाध्यममा छाउनुभएको छ । रामेनमा अब्बल युवाध्ये उहाँ पनि अग्रस्थानमा हुनुहुन्छ ।
यामेन्द्र सामाजिक क्रियाकलापमा पनि उत्तिकै सक्रिय हुनुहुन्छ । उहाँ पछिल्लो समयमा युवामाझ लोकप्रिय हुँदै जानुभएको छ । पोर्चुगलमा नेपाली समुदायको प्रायःजसो गतिविधिमा उहाँ सक्रियतासाथ लाग्नुभएको छ । आफ्नो कर्मसँगै सामाजिक क्षेत्रमा उत्तिकै समय दिनुभएको छ ।
