सिन्धुपाल्चोक । नेकपा एमालेका पोलिटब्युरो सदस्य गोकुल बास्कोटाले एकीकृत समाजवादीको अस्तित्व अब सकिँदै गएको दावी गरेका छन् ।
नेपाल कम्युष्ट पार्टी एमाले जिल्ला कमिटी सिन्धुपाल्चोकको आयोजनामा चौतारामा भएको कार्यक्रममा बोल्दै बास्कोटाले समाजवादीको पसल धेरै दिन नचल्ने बताए । समाजवादीलाई देशबाटै कोल्याप्स बनाइदिने उनले उद्घोष गरे ।
एकीकृत समाजवादीका केन्द्रीय सदस्य एवं सिन्धुपाल्चोक इन्चार्ज सुवास कर्माचार्य सहितका नेता कार्यकर्ताहरूलाई एमालेमा भित्र्याउँदै उनले जुका जस्तै अरू पार्टीसँग टाँसिएर बस्ने पार्टीहरूको औचित्य सकिदैँ गएको बताए ।
समाजवादी मात्रै नभएर माओवादी पनि क्रमशः कोल्याप्स हुँदै जाने उनले दावी गरे ।
बास्कोटाले अब त्यो धारमा बसिरहेका समाजवादीका अन्य नेता कार्यकर्ताहरूलाई पनि एमालेमा फर्कन आग्रह गरे ।
