काठमाडौं। इजरायलले नेपालबाट लैजाने श्रमिकको संख्या बढाउँदै लगेको छ । केयर गिभरका लागि अब ८०० जना श्रमिक इजरायल जान पाउने भएका छन् ।
वैदेशिक रोजगार बिभागले उम्मेदावारको लागि आवेदन माग गरेको छ । ८०० मध्ये ५०० जना मुख्य र ३०० जना वैकल्पिक उम्मेदवार हुने सूचनामा उल्लेख छ । ६० प्रतिशत महिला र ४० प्रतिशत पुरुष इजरायल जान पाउने छन् ।
२५ वर्ष पुरा भएर ४५ वर्ष ननाघेको, कम्तिमा ४५ केजीको व्यक्तिले आवेदन दिन सक्छन् । इजरायलको रोजगारमा जान १० कक्षा पास गरी अनमी वा सिएमए सम्बन्धि विषयमा कम्तिमा १५ महिना अध्ययन पूरा गरेको वा कक्षा १२ वा सो सरहको शैक्षिक योग्यता हासिल गरेको हुनुपर्छ । यसका साथै नेपाल सरकारबाट मान्यता प्राप्त तालिम प्रदायक संस्थाबाट केयर गिभिङ्ग सम्बन्धी कम्तीमा ३ महिनाको तालिम प्राप्त गरेको हुनुपर्ने छ।
पहिला इजरायल गएकाहरूलाई प्रतिष्पर्धामा सहभागी गरा इने छैन । आवेदकको बुवा, आमा, पति, पत्नी, छोरा वा छोरी इजरायलमा बसोबास नगरेको वा कार्यरत नरहेको हुनुपर्ने उल्लेख छ ।
इजरायल र नेपालबीच श्रम सम्झौता भएपछि नेपालीहरुले इजरायलमा केयरगिभरमा जानेको संख्या बढ्दै गइरहेको छ । उनीहरुले ५ हजार ८८० इजरायली सेकेल अर्थात २ लाख १० हजार नेपाली रुपैँयाा पारिश्रमिक पाउँछन् ।
उनीहरुले सातामा ४२ घण्टा काम गर्नुपर्ने छ। आवासको प्रबन्ध हुन्छ । । एक पटक रोजगारमा जाने कामदारको करार अवधि १ वर्षको हुन्छ । करार थप्दै ५ वर्षसम्म बस्न पाइन्छ ।
