भक्तपुर । भक्तपुरको सानोठिमीस्थित बाल सुधार गृहबाट भागेका नाबालक भेटिएका छन् । २ सय २१ जना नाबालक बन्दीमध्ये १९८ जना सम्पर्कमा आएका हुन् । फरार भएका मध्ये २३ जना सम्पर्कमा आउन सकेका छैनन् ।
झडपको क्रममा भागेकाहरुलाई प्रहरीले कोटेश्वर, बानेश्वर र सातदोबाटो क्षेत्रबाट पक्राउ गरेको हो । केही नाबालक बन्दीहरुलाई परिवारले नै सम्पर्कमा ल्याइदिएका छन् । बालसुधार गृहमा नाबालक बन्दी कमल बस्नेतको मृत्यु भएको घटनाको विषयमा प्रदर्शन हुँदा झडप भएको थियो । रामेछाप घर भएका १८ वर्षीय बस्नेतको आइतबार मृत्यु भएको थियो।
झडपमा परेर १८ जना सुरक्षाकर्मी र १२ जना नाबालक बन्दी घाइते भएको प्रहरीले जनाएको छ। उनीहरुको उपचार हुँदै छ । त्यहाँ रहेका ३३ जना बालक र ४२ जना बालिका सहित ७५ जना भने कतै नभागेर त्यही बसेका थिए ।
