काठमाडौं । खाडी मुलुक जाने मध्ये ८० प्रतिशत घरेलु श्रमिक गैरकानुनी बाटोबाट जाने गरेका छन् ।
घरेलु श्रमिकमा विभिन्न मुलुकमा पठाउन सरकारले अवरोध गरेपछि श्रमिकहरु गैरकानुनी बाटोबाट पुगेको अध्ययनले देखाएको छ ।
आप्रवासी महिला कामदार समुह (आमकास नेपाल) को अध्ययन अनुसार सरकारले बाटो बन्द गरेपछि अवैध बाटोबाट जाने गरेको पाइएको हो ।
आमकास नेपालले उद्धार गरेका तथा आश्रय सेवा दिएका ७३ जना मध्ये ६० जना (८२ प्रतिशत) गैरकानूनी बाटोबाट गएका थिए । घरेलु श्रमिकका रुपमा खाडीमा जान सरकारले २०७३ सालदेखि बन्देज लगाउँदै आएको छ ।
बन्देजले महिला श्रमिकलाई समस्यामा पारेको, अनियमित बाटो भएर जान बाध्य पारेको र यसले जोखिमलाई अझ बढाएको जानकारहरु बताउँछन् ।
संसदको उद्योग तथा वाणिज्य र श्रम तथा उपभोक्ता हित समितिले २०७७ असोज १३ गते विभिन्न ७ वटा शर्त पूरा भएमा वैदेशिक रोजगारीमा घरेलु कामदार पठाउनु भन्दै सरकारलाई निर्देशन दिए पनि कार्यान्वयन हुन सकेको छैन ।
